周日英冠球隊打比郡宣佈，今季帶隊11戰1勝嘅荷蘭籍領隊高古經雙方協議後，決定即時離開球隊。球隊暫時委任咗四名暫代領隊，當中包括球員兼教練嘅朗尼，佢更加有機會正式接手球隊。不過，英媒就指朗尼嘅前英格蘭國家隊隊友、阿士東維拉現任助教泰利都想趁機坐正，2位亦暫時係接任領隊嘅2大熱門人選（見附表）。
2019年夏天被任命為打比郡主帥嘅高古，本身希望靠佢帶領球隊升上英超，可惜上季最終只係排第10位，今季嘅成績仲差，開季11場贏得1場排喺榜尾，連早前被扣六分嘅錫周三都排喺佢上面，所以打比郡決定把握國際賽賽期，作出換帥嘅決定，將早前確診武漢肺炎嘅高古，連埋助教雲達韋爾特同一隊教練史普斯一次過炒晒，安排隊中四位教練做住暫代領隊先，而前曼聯球星、現任打比郡嘅隊長兼教練朗尼就當然有份。
高古落鑊後，朗尼亦開腔話：「我對高古同佢團隊要離開球會感到難過，好多謝佢一路嘅幫助同鼓勵，但目前最重要係令球隊保持穩定，同喺聯賽榜升番上去。我已經俾球會委任為教練組成員之一，為星期六作客鬥布里斯托城嘅大戰做好準備。」其實朗尼今年同打比郡簽球員兼教練嘅合約時，外界一早已經睇好佢假以時日就會「上位」，所以佢成為打比郡下任領隊嘅呼聲好高。不過，朗尼未完成歐洲足協嘅教練證書課程，如果佢要坐正，就要一位有領隊經驗嘅助教支援。
根據賠率比較網oddschecker嘅顯示，朗尼以1.5倍成為接手大熱，前車路士隊長泰利就以四倍緊隨其後。泰利自2018年起一直喺阿士東維拉擔任助教，相信都係為做領隊鋪路。如今打比郡辭退高古，唔少人認為係泰利跳出嚟坐正嘅好時機，所以佢都係次熱嘅人選。
其實，同朗尼、泰利同期嘅一班英軍前隊友，有唔少都已經執起教鞭，好似泰利老死林柏特，正正就係教打比郡起家，𠵱家仲教緊Big 6之一嘅車路士，仲有柏加亦順利帶領富咸由英冠升上英超，謝拉特更加帶領格拉斯哥流浪今季保持不敗。不過，前維拉前鋒戴倫賓特就潑冷水，認為泰利走去教打比郡未必係好事：「泰利會成為領隊，但唔係𠵱家，高古係一個有經驗嘅領隊，但隊波都仲喺榜尾，打比郡嘅情況並唔樂觀。」