阿仙奴近期公關災難多籮籮，奧斯爾風波未平息，近期佢哋又再激嬲一班動保人士。事緣兵工廠上年同柬埔寨啤酒品牌Ganzberg簽署咗一份為期三年嘅贊助合約，近期就俾人查到Ganzberg嘅街邊廣告入面，竟然鼓勵人用狗肉配搭啤酒，辣㷫咗一班動保人士。
英國愛護動物團體Four Paws嘅發言人向英國《獨立報》表示憂慮：「今次阿仙奴唔同Ganzberg割席，令到球會畀咗人反感嘅形象，我哋希望阿仙奴重新反思係咪真係同呢間啤酒公司合作。我哋亦希望今次只係球會一時疏忽，而唔係真心支持呢種活動。」阿仙奴之後就否認同任何狗肉貿易有關，亦都話同Ganzberg溝通過，對方保證唔贊成食狗肉，並且積極拆緊呢啲廣告牌，家陣已經有800幾個廣告牌拆咗落嚟，更加向部份餐廳實行法規，唔畀佢哋喺賣Ganzberg嘅同時賣狗肉。不過Four Paws就似乎唔係好滿意呢個答覆，因為佢哋話阿仙奴同Ganzberg其實4月嘅時候已經做出過類似承諾，但上星期又見到有新嘅海報出現，真係信唔過。