張建宗話疫情嚴峻禁止記者戶外遊行，但唔知點解嚴峻嘅疫情又唔會增加閉門群聚活動嘅播毒風險，於是777由周六開始一連三日喺禮賓府搞閉門授勳儀式，只係第一日已經有200幾人領取勳銜同嘉許，而呢場授勳777冇令大家失望，盡情畀大家再見證佢人性涼薄一面。
呢次授勳儀式包括向今年1月喺反走私行動中不幸殉職嘅三名海關關員追授金英勇勳章，勳章就由家屬代領，其間台下賓客報以熱烈掌聲，但痛失親人嘅家屬就喺台上神情肅穆，有家屬更難掩哀痛，負責授勳嘅777今次經一事之後冇再大笑啦，但佢唔只冇肅立致敬，仲一齊拍拍手，八方就諗極都諗唔通佢係想表達乜嘢，但就記得佢有前科，17年佢終於做到特首之後主持首個授勳，同樣向殉職消防總隊目邱少明追授金英勇勳章，然後同遺孀合照時，就一直好開心咁笑囉。
講番呢場授勳，最大贏家應該係POPO，有超過90人來自警務處，當中包括多個聲稱自己在反修例衝突中受傷嘅警員，獲頒銀英勇或者銅英勇勳章，但佢哋之前做啲建制傳媒訪問，就英勇到唔敢開名而要匿名或者用代名，但一有獎勳章攞就可以用真名示人，唔知點解忽然唔驚畀人起底，既然係咁，做乜仲要匿喺禁制令後面做受保護動物先？
李八方