曾偉權上周四早上因肺癌離世，終年59歲。死訊傳出後，網上流傳他借劇集《牛下女高音》角色「黑仔」，發表人生觀的片段，片中他明顯憔悴但有笑容︰「有啲病突然出現咗，你冇辦法控制，唯一方法就係接受。我嘅方法係積極面對，盡自己能力，做得幾多做幾多。」
曾偉權心態豁達，而一直照顧他的契妹SaSa將為他處理身後事，前晚她在曾偉權好友鄭敬基的YouTube頻道證實其死訊時，透露曾偉權遺願︰「權權生前交帶落，萬一佢不幸離世嘅話，千祈唔好同佢設靈，識佢嘅人都知怕嘈吵、應酬，愛寧靜，希望大家諒解，如果思念佢就為佢祈禱，將思念變為愛嘅力量，成全佢繼續為流浪貓狗爭取權益，將佢遺願延續下去。」
Sasa感謝圈中人幫忙：「排名不分先後，有古天樂、陳煒、姚嘉妮同歐瑞偉，另外一定要提鄭敬基，因為權權做手術嗰陣，佢同太太差唔多每隔一日就會煲埋湯探權權，出院後都成日探我哋，仲託日用品過嚟，Joe哥（鄭敬基）成日都開解我，係好好嘅聆聽者，好感激佢。」
鄭敬基回覆《蘋果》時說，與太太返加拿大後，亦有跟曾偉權和SaSa保持聯絡：「12號朝早我收到消息，早期未有疫情前，去醫院又好，亦都有去佢屋企探望權權，我哋好似半個家人。」他說SaSa曾拜託他兩件事：「第一，佢知我係公眾人物，亦好似半個家人，所以選擇喺呢度公佈權權消息，唔係58歲，係59歲，1960年11月22日，差十日就60歲！佢話記得加番感謝天主，因為權權係天主教徒。第二，佢希望我一次過講畀傳媒知，佢之後會繼續教琴，照顧權權留下嘅貓狗。」
薛家燕和胡楓昨日出席台慶綵排時談到曾偉權離世都十分惋惜，家燕姐說︰「一個咁好嘅人點解會有呢個病？佢年頭發現時仲好堅強面對，希望佢一路好走。」胡楓說︰「同佢合作唔多，但我知佢份人好專業，工作好認真。」對於曾偉權不設靈，兩人指會尊重死者遺願。
