上星期三校友會重啟午餐例會，以前臨時有校友未報名就上嚟參加，咪一於加位囉，試過一圍枱坐14至15人，幾乎係零距離。現在唔得咯，一早在電郵講明限額30人參加，開五張枱，每枱距離1.5米，但仍然有校友臨時要加入，唯有硬起心腸請佢地走。是日演講嘉賓A有號召力，如在正常時期，開定六圍吸引七十幾人捧場，輕而易舉。
嘉賓A坐低冇耐，就同左丁山講：「今日人大DQ四位議員。」再過十幾分鐘，手機響起，果然係新聞警示：四名議員被DQ。問嘉賓A點解咁消息靈通，佢話：「剛才在地鐵聽到一啲鄉音講嘅唧！」
晚上入到馬場，碰到常客貿易M，佢氣沖沖，細細聲咁話：「冇咯，冇咯，夾硬DQ都得，一國兩制仲邊度會有，我個仔從美國返咗嚟十幾年，現在決定返紐約搵工，我唔捨得都叫佢快啲成行。」哦，咁國際學校又少咗佢位孫兒學生。
未有DQ事件之前，在珠三角設廠嘅廠商S，已經同左丁山講：「我兩個仔話現時香港令佢地年輕人恐懼，從外國畢業回來工作幾年，第一次恐怕香港會失去自由，話要一齊返去讀大學嘅地方，即係雪梨。」廠商S一個仔係IT專才，一個仔係律師，本是香港幾需要嘅下一代接班人，奈何環境迫人，香港可能出現慢性brain drain！據知香港大學一位國際知名，世界級講座教授會跳槽去新加坡，步中大沈祖堯後塵。張翔唔怕嘅啫，有中央支持，大可向清華大學搵叻人落嚟替補。
立法會應有70名議員，連DQ及總辭，立會議員總共留低43名議員，不足三分二之數，其中41名係建制派，政府議案可以加快，無異議通過，難怪林鄭表示興奮。不過又唔好高興得太早，因為不少建制派議員在立法會以外身兼多職，又要搵食（如陳健波係保險公司CEO），故此過往不時行開，令泛民提出點人數，否則點會偷雞成功，導致立法會流會吖。咁以後冇晒泛民議員，無後顧之憂，建制派議員會唔會要辦私事更瘋狂呀？民建聯、工聯會議員（根據一位前局長私底下講）對審議英文法案文件水平係比泛民議員低啲，以後啲政策局常秘唔該多啲把關，以後有出醜事件，唔可以再賴泛民搗蛋！立法會會議廳由43位議員做騷，全港市民受𥄫住，睇吓你地有幾叻！