四名民主派議員上周三遭人大DQ後，15名民主派議員翌日即向立法會秘書處交辭職信。有民主派議員向八方表示，民主派議員辭職生效日期略有不同，但最頭痛唔係撤出議辦執嘢，而係俾建制派控制嘅立法會行管會，追返DQ4過去幾個月使嘅議員開支同議助人工，隨時要眾籌先應付到。
民主派議員撤出立會大樓日子個個有啲唔同，好似DQ4咁，據知遷出立法會日子由上周三（11日）起計算，所以公民黨楊岳橋、郭榮鏗同郭家麒，以及會計界梁繼昌，照計最遲呢個月26日就要執齊嘢離開立法會。至於辭職生效日期喺12月1日開始嘅15名民主派議員，照計要喺12月16日清理好議辦離開，即由呢日開始立會唔會再有民主派議辦喺大樓入面。
不過，對民主派議員嚟講，最重要係要處理好員工遣散安排，八方聽聞當中以DQ 4安排最複雜，因行管會最快今日開會傾處理DQ 4子同15名泛民總辭後薪津問題。有民主派議員話，由建制派操控嘅行管會，若要求DQ 4子歸還自7月30日後營運開支，金額相當龐大，單係議助薪酬同辦事處租金，加加埋埋都已近100萬元，所以唔排除到時要眾籌方式應付。
該民主派議員亦話，當初係政府同立會主席梁君彥宣佈全體議員可以延任一年，但政府喺呢班議員開工幾個月就話要DQ佢哋，若然呢班議員咁都要交還全部營運開支，其實即係等於叫人返工但唔出糧？道理上實在係講唔通。
李八方