一單輝瑞疫苗消息，全球股市上周可謂風起雲湧，疫苗路線圖逐步明朗，經濟復蘇有望，資金即時抄底疫情重創股（如航空、遊輪、酒店、銀行、基建股），炒到極致的科技股就來個「均值回歸」，宅經濟股Zoom（ZM）、Peloton（PTON）全周大瀉20%，災味甚濃！
難道有疫苗就不需要再開視像會議？不再在家健身？當然不是，特別是前者，基本已成新常態，屬永久性的生態轉變，不會因為一支疫苗而逆轉。
那麼為何會跌成咁呢？試想一下，過去半年疫情肆虐，而疫苗又未有消息，前景極不明朗，大戶唯有重倉新經濟股避險兼搵食，圍爐之下自然升得燦爛。不過，如今疫苗見到曙光，科技股狂炒後估值貴了，相對殘到嘔的舊經濟股，再重倉科技股的風險與回報就不成正比了。大戶每人減少少科技，已足夠令股價山泥傾瀉，而目前相信仍是執倉潮的初期。
咁對炒股策略有何影響？一、科技股上升動力會逐步減弱，皆因逢彈就有人趁高減貨，即使行業前景有幾好，升勢都會較之前放慢。二、買科技股要開始揀擇，特別是二三線「渾水摸魚」、行業競爭又大、自身競爭優勢不明顯嗰堆，清晒佢無壞，留番龍頭嗰幾隻即可。三、睇實美國10年期債息，近日拾級而上，逼近1厘心理大關，無風險利率趨升，對科技股估值影響最大，反觀對仍然低殘的銀行、保險股較有利。
魏力