香港虛銀，近期有三件事值得留意，兩單與利息相關，先講天星銀行以5%高息搶眼球，新開戶首2萬元擺半年，利息可袋500元，算是低息環境下一個唔錯選擇，加埋喺「全民造星」落廣告，上客量係咪達標？
該行自6月11日開業，從未正式公佈開戶總人數，快要半年，應該是成熟時機正式公佈吧？
第二是眾安銀行推出0.07%月平息貸款利率，借20萬元，還款期數為6至24個月，實際年利率低至1.45厘。第三是Livi通知客戶有幾項改動，包括提升security keypad、容許capscreen、推出in-app訊息中心等，算是從善如流。
本港虛銀大致如此，暫時無乜update，不如睇吓外國的金融科技公司。早前有報道指，法國手機支付企業Lydia揀選瑞典Tink為開放銀行夥伴。先被Lydia這名字吸引，誰是Lydia？
上官網找答案，發現Lydia原先是一個王國，即是現今土耳其的一部份，當時有條名為Pactole的河，而且金、銀蘊藏量豐富，該國利用金、銀在大約公元前7世紀鑄造硬幣，令該國富強起來，該國最後一任又最受人愛戴的國王為Croesus。
公司解釋改名做「Lydia」，是以現代科技向貨幣歷史致敬，𠵱家用戶將「Lydia」當成動詞，意思是支付，千禧新世代會話「轉頭Lydia你」，就好似香港用家講「轉頭PayMe你」一樣。
呢個App可以理解做PayMe 3.0，除了P2P、B2C支付，可以小額借貸，亦有儲蓄、海外提款等基本功能。唔少人擔心使用記賬卡或信用卡在不知名網站購物有被盜風險，Lydia推出咗「用後即焚上網卡」（Ephemeral Internet cards），按用戶要求每次生成一組卡號供用戶網購，之後該卡號會自動失效，安全度瞬間提升，然而，呢款卡有上限，除非課金使用最貴的付款版先可以無限使用。
講多一句，Lydia今年初B輪融資4,000萬歐元，領投者是騰訊。
杜夫人