特朗普今次行政命令等於使出資本市場大招，根據其行政命令嘅字面解釋，一眾被美國認定屬於解放軍控制企業以至其上市附屬，美國企業同個人都要喺一年內沽出，而兩個月後開始永遠唔准買入，直至命令解除。
大家可以望吓受影響嘅港股名單，就知道呢招係對美國投資者嘅大獎賞，而唔係懲罰。受影響名單包括，三大中資電訊股、中交建（1800）、中鐵建（1186）、中車（1766），呢批係市值較大嘅受影響股份，全部係質素最差嘅中資股。中資電訊股喺國策之下被迫平價向國民提供服務，毫無增長前景可言。
中資交通基建股多年來係利益集團食夾棍嘅溫床，買入長揸等於中咗魘夢血鬼術，股價一睡不起。偏偏呢批股份一直好似老而不咁留喺唔同指數裏面。今次行政命令，好讓基金公司可以趁機沽出呢批喺被動投資被迫買入嘅弱勢股，減持弱勢中資股後，估計會加注美股，或按指數比例買返其他重磅中資股，變相加注阿里（9988）、騰訊（700）、美團（3690）、拼多多之類，你話對美國投資者嚟講，係咪一個好消息？
周五ATMXJ繼續大反彈，或許同呢個侵侵行政命令有一定關係。由於措施對美國資本市場有利，估計事在必行，兼且美國國內冇乜阻力。
晉佳