除了新蒲崗貨車錶位被「私有化」外，不少私家車錶位多年來亦遭非法霸佔，當中不少涉黑幫操縱，以油尖旺最嚴重，包括尖沙嘴山林道，全條街都被新義安佔據；佐敦白加士街、偉晴街、炮台街則為勝和南亞幫「地頭」，就連尖沙嘴加拿分道近香檳大廈一段斜路僅六個車位，也被人長期「私有化」。
「成條街都係我哋嘅，全部一式一樣㗎喇！」記者駕車駛到新義安盤踞多年的山林道咪錶位，一名陀地儼如「停車場揸fit人」主動開價，又直言成條街由他們話事，指咪錶位時租60元泊兩小時，最低消費兩小時。
如車輛泊過夜，月租由4,000元起，「畀得我哋（泊）就一定唔會抄（牌），因為我哋有幾個大場（霸佔其他街道錶位）喺度！ 」但客人須「留匙」，陀地會將車停泊在空位，待客人回來取車，再將車駛來。有蠱惑仔直言，因為該區商廈和住宅林立，搵位艱難，故不少車主選擇幫襯「月租錶位」。
記者發現不少名車泊在路邊，但絕大部份咪錶都顯示「逾時」，當俗稱咖啡仔的交通督導員巡經，站在街頭巷尾的陀地才以對講機通知「手下」逐一入錶，但每個錶位只象徵式入兩元泊15分鐘。
至於佐敦一帶，同樣出現黑幫錶霸，其中偉晴街由南亞幫操控，一有泊位空出，他們即以膠椅霸佔。「兩個鐘50蚊，至少兩個鐘，擺全日，最多170元！」白加士街則由本地幫和南亞幫經營，分別以每小時收費20元及40元兩小時向車主撈生意，雖然對比附近私人停車場時租26元便宜，但全部規定必須留車匙，車主風險較高。
有交通督導員直言難以執法：「法例冇話唔可以幫人入錶，總知咪錶入咗錢，已經係合法泊喺呢度！」他坦言明知不少錶位被人霸佔，也曾向部門反映，但難以杜絕：「我哋都冇辦法，以我所知警察都係冇辦法，放蛇？應該唔會做囉！」
新一代智能咪錶備有多項功能，除可八達通繳費外，亦可信用卡、QR code，電子錢包Apple Pay、Google Pay、微信支付、支付寶及轉數快等十多種方式，駕駛者可透過手機App遙距付費，但最多只可支付該咪錶兩段「最長泊車時間」。如想泊更長時間，就要親自到咪錶付錢，而車輛最多亦只可泊24小時。
同時，新一代咪錶配備感應器，以偵測車位是否被佔用，以提供實時資訊，協助駕駛者尋找空置泊車位。一旦有停車不繳費的情況，中央系統會將資訊交給警方參考，警方可即時前往抄牌。