強積金關乎市民退休生活，可投資的資產有一定制約，以管理風險，這個正常不過，是故滬深兩間證券交易所持倉上限僅為10%，原因就是中國資本市場未完全開放，就算滬港通、深港通啟動多年，積金局過去多年仍然重申條件未成熟。
不過財庫局局長許正宇在其Blog一聲令下，滬深交易所成為強積金「核准交易所」，10%上限緊箍咒消失，難道許局長收到中國資本賬開放的絕密消息？如果不是，那轉捩點是甚麼？買賣股票流動性風險如何remedy？許局長解釋：「早前我跟業界交流，聽到意見認為A股國際化程度不斷提升，在與積金局協調及作出研究後，將上海及深圳交易所納入積金局『核准證券交易所名單』的條件已經成熟。」
大佬，由2002年QFII開始A股市場已經不停國際化，滬港通、深港通分別2014年、2016年開通，聽到意見A股國際化程度不斷提升？咁即係暗示積金局過去咁多年聾咗？然後許局長繼續話，同積金局協調同研究後，滬深交易所成為「核准交易所」條件已經成熟。局長一定係幫佢哋注射咗豬激素，所以熟得咁快？
積金局之後回應亦搞笑，解釋滬深交易所獲納入，係根據「最近一次檢視和評核，並參照一籃子關乎交易所的具體因素和市場因素的審核準則」，請問即是甚麼因素、甚麼準則？更有趣嘅係，早年積金局主席黃友嘉解釋過A股遲遲未完全開通，係因為業界需求不大，想投資中國亦可以買H股。係啊，許局長都自爆A股只佔強積金總資產1.12%，乜近排打工仔突然對A股需求大咗咩？定其實係A股對強積金需求大咗，要拎香港市民血汗錢去托市？
許局長唔只幫大家開咗條退休金送中渠道，仲送埋去波蘭同印尼！華沙證券交易所上市公司總市值只係約1萬億港元，印尼證券交易所市值亦只係3萬億港元，但獲納入「核准交易所」原因同兩間分別幾十萬億元市值嘅交易所一致，政策可謂毫無邏輯可言。
其實積金局過去20年好多事情上章法比較混亂，業界都苦笑。見到許局長今次咁疏爽，程總裁諗到個方法幫業界，就係直接上訪財庫局，等許局長「聽到」，任由行政架構Freestyle，繞過積金局，事事都可迅速解決。
程總裁