1879年成立嘅前英超球會新特蘭（黑貓、圖），近年戰績低沉，家陣喺英甲打滾，今季10戰6勝3和1負暫排英甲第6位，爭升班資格。英國傳媒話，兩年前降到英甲時買入黑貓嘅班主當奴，已同意將球會賣畀少數股東沙爾托里同22歲嘅基利路易杜里費斯（小圖）。英媒話談判喺半年前已開始，有機會喺未來兩周內完成收購。英媒就將基利「起底」，發現佢老竇原來係前馬賽班主羅拔路易杜里費斯，但不幸喺2009年因白血病離世，據福布斯估計基利有超過15億鎊（約150億港元）信託基金，所以新特蘭今次有基利接手，外界關注佢會唔會好似佢老竇咁有心搞波，協助呢支老牌球會重返英超。