前一輪收到8至10月電費單，要交四千幾蚊電費，為之皺眉頭。過往幾年努力減少用冷氣，慳電有啲成績，每年8至10月之用電高峯期，用電量一年低過一年，點知今年反彈轉升，原因係乜？諗真吓，今年冬至氣溫竟然接近30度，八月、九月氣溫長期高企，連家中跳跳紮之一年班、二年班孫女都識得走入房睡開冷氣，有乜符？至於位於中環之寫字房，因每次電費都只係幾十元，港燈索性唔收㖭。
每年呢個時候，就係兩電加價之期，會加幾多呢？11月10日宣佈嘞，淨加價係零，好消息也，左丁山不是港島居民，比較關心中電是否加價。首先港燈宣佈2022年基本電費雖然調高，但燃料調整費下調，可全數抵銷有關升幅。即係點？2021年度淨電費維持每度電126.4仙、基本電費每度電增加7仙，由102仙加到109仙，燃料調整費降低7.4仙至每度電17.4仙，兩者加埋仍然是每度電126.4仙。港燈在過去幾年將政府多收嘅差餉地租，以回扣方式退還客戶，之不過「地租及差餉回扣」今年會發放完，2021年冇咯，燃料調整費之向下調，係反映燃料市場價格變動。
中電又如何？中電另有基金叫做「中電社區節能基金」，撥款一億六千萬元予多個社區支援計劃，電費在2021年凍結於2020年水平。市民之中，邊個可以受惠呢？一共有六項：（一）消費券，明年1月向80萬個低用電量住宅家庭、1萬個劏房用戶、享有長者電費優惠客戶派發100元消費券，為期半年；（二）全心傳電計劃，向4萬個合資格家庭派500元電費資助，所有住宅客戶可參加「全心傳電」計劃，用電比去年減少或參與節能活動，可獲節能電器等貨品；（三）支援劏房住戶，為1萬個住戶提供600元電費資助，過渡性房屋住戶獲捐贈2000元節能電器，預料五千個家庭受惠；（四）工商客戶亦有份，基金撥款2000萬元資助客戶提升能源效益；（五）資助社福機構慳電，撥款300萬元；（六）資助職業、專才教育學生升學，有75個名額，每個2萬元，給予職訓局推薦之學生。
唔加電費兼撥款1.6億優惠客戶，世間少有。香港每有議員及評論員指責兩電賺到盡，根本係忽視政府合約精神，又指要開放電力市場，其實等同向大陸買電，增加香港對內地之倚靠程度，政府早已諮詢過市民，受大力反對啦，仲講嚟做乜！
香港之電力供應穩定性，全世界最可靠，係香港經濟競爭力之支柱，千祈咪受到民粹主義破壞！