非洲踢緊2021年非洲國家盃外圍賽分組賽，其中上周五喺L組第三輪賽事，出線熱門「超霸鷹」尼日利亞（綠白衫）主場出擊對塞拉利昂，開賽頭半粒鐘領先4:0情況下，竟俾客軍連追四球，奇蹟咁4:4完場。超霸鷹今仗有唔少熟識名字壓陣，包括效力愛華頓嘅伊禾比、今夏轉會費高達6,300萬鎊加盟拿玻里嘅前鋒域陀奧森漢、前李斯特城前鋒阿密特穆沙等。結果開賽僅四分鐘先開紀錄，跟住入波陸續有嚟，開賽頭半個鐘已領先至4:0。佢哋以為贏梗，點知喺38分開始大逆轉，塞拉利昂由昆恩揭開追平序幕，直至完場前四分鐘，由艾夏治卡馬拉近門頂入成4:4，追成平手。賽後超霸鷹以七分排喺榜首。