國際賽期間對唔少球會嚟講可能係噩夢，球員四散去唔同地方備戰，喺武漢肺炎陰霾仲存在下，危險性都相當高。埃及足總喺上周五宣佈，利物浦前鋒穆罕默德沙拿接受武肺病毒檢測後呈陽性，正接受隔離，繼祖高美斯重傷料收「咧」後，今季多災多難嘅紅軍又多一人要缺陣一段時間。
沙拿今個月俾埃及國家隊徵召出戰非國盃外圍賽，佢喺賽前做檢測時結果呈陽性，埃及足總上周五發聲明話，沙拿雖然確診，但冇任何症狀，目前已經隔離緊，除缺席噚日同星期二兩場對多哥嘅比賽、仲有利物浦嚟緊兩場嘅賽事。不過，沙拿喺去埃及國家隊報到前，去咗哥哥拿斯喺開羅嘅婚宴，其間仲冇戴口罩同親友跳舞兼影相，可能就係喺婚宴中不幸咁中招。
沙拿因隔離預計要缺席紅軍嚟緊兩場賽事，包括喺下周日主場硬撼李斯特城嘅榜首大戰，但紅軍𠵱家有六位正選球員都因傷病上唔到陣，相信領隊高普排陣好頭痕。而喺上周膝部嚴重受傷嘅祖高美斯，近日已完成手術預計出年6月先可以復出，佢上周五喺受傷後首度開腔：「我嘅康復之路已展開，當我回歸時，將會變得更好同更加強大。」
歐洲嘅武肺疫情仍然嚴重，國際賽檔期各大聯賽嘅國腳仲要周圍飛去比賽，最慘嘅係，國際賽防疫措施真係得啖笑，早兩日已有克羅地亞嘅杜馬高維達踢踢吓先知確診武肺，踢咗半場先被換走。點知上周五愛爾蘭足總發聲明，指喺上周四友賽英格蘭踢足全場嘅中場阿倫布朗尼賽後檢測呈陽性反應，布朗尼曾經同哈利馬古尼、菲爾科頓等英超球員有身體接觸，都唔知會唔會令一班英格蘭大軍中招。另外，南韓足總喺上周六宣佈，喺維也納備戰嘅南韓國家隊陣中有四名球員，包括蔚山現代門將趙賢祐、弗賴堡中場權昶勳、魯賓卡山中場黃仁範、釜山偶像翼鋒李東俊同一位工作人員確診，全隊已經一齊練咗成個星期，其他球員好似熱刺嘅孫興民隨時都中招，足總就話會為球員再做檢測。
英國最近實施新政策，所有喺英超效力嘅國腳喺國際賽服役返英後，需要檢測呈陰性先可以重投球隊訓練。呢項新措施令唔少領隊擔心旗下球員或冇法趕得切國際賽期後首個周末聯賽出場，事關球員可能周四或周五先返到英國，再做埋檢測至少要等48小時。為咗加快檢測進度，英媒話賽會將會安排檢測人員喺機場直接同球員做檢測，等球員盡快可以收到結果，為英超賽事做準備。
