上周五喺2022年世界盃南美洲區外圍賽第三輪賽事，巴西主場喺缺尼馬情況下迎戰委內瑞拉，結果仍靠羅拔圖法明奴喺下半場67分鐘一箭定江山，一球小勝對手，豪取三連勝獨佔榜首。上月已連勝兩仗嘅巴西，由於宿敵阿根廷上周四只賽和巴拉圭，巴西今仗只要全取三分就上榜首，但有尼馬、菲臘比古天奴等球員缺陣，所以巴西今仗排出英超攻擊線，由利物浦前鋒羅拔圖法明奴、愛華頓前鋒李察利臣配合曼城前鋒加比爾捷西斯攻堅。41分鐘巴西有杜格拉斯雷斯補中，但李察利臣推人在先唔計數，結果半場0:0。踢到於67分鐘，委內瑞拉後衞解圍出錯，俾法明奴輕鬆射入，巴西最終贏1:0。
另外，烏拉圭作客大戰哥倫比亞，烏拉圭憑曼聯射手卡雲尼開賽五分鐘先開紀錄、蘇亞雷斯下半場射入12碼，加埋踢賓菲加嘅21歲新星達雲紐尼斯埋齋，最後幫烏拉圭3:0擊敗尾段有愛華頓中堅耶利文拿兩黃一紅嘅哥倫比亞。同日另一場，冇咗球星阿歷斯山齊士嘅智利，憑33歲老將維達爾梅開二度，協助球隊2:0輕取秘魯。