【名家足路】
【對決場次︰瑞典vs克羅地亞】
上個星期推介西甲「升班馬」卡迪斯畀各位，點知最後慘負馬德里體育會四蛋，係佢哋今季升班以嚟最大敗仗，都唔知係咪我真係咁燈力無邊。不過，呢個星期轉一轉貼國際賽，係時候轉運，記得之前推介歐國聯啲波，準繩度都唔錯，仲中過兩次克羅地亞嘅比賽，一於就再向「格仔軍」埋手求翻身。
克羅地亞呢輪歐國聯有兩場波要踢，先係周六作客瑞典，然後下周二再主場鬥葡萄牙。其實睇一睇家陣A3組嘅積分榜，形勢已經一目了然，就係決賽周入場券只係同樣10分在手嘅法國同葡萄牙之爭，而今場對碰嘅克羅地亞同瑞典，分別得3分同0分，都已經冇晒希望，但如果佢哋唔想下屆降落B級賽事，就唔可以包尾。
講真包唔包尾，要降落B級別，佢哋又未必好care，分分鐘對住實力弱少少嘅球隊，贏得多仲可以提升世界排名。但瑞典家陣喺呢組四戰全敗，唔想咁冇面，呢場波會上力啲，而且話晒係主場，點都要報上個月作客輸畀格仔軍1:2之仇。
格仔軍自從2018年世盃攞完亞軍後，已經洩咗道氣，而且由上屆歐國聯開始，喺呢項賽事四場作客都輸晒，隊波最「弗」嘅前鋒卡拉馬歷又因為確診武漢肺炎未好返，佢唔喺陣中真係捧唔落手。反而有睇意甲，應該知瑞典隊內有個家陣踢祖雲達斯嘅小將古路施夫斯基上緊位，仲有軒歷拿臣囝囝佐敦拿臣都唔錯，喺俄超隊莫斯科斯巴達踢得有聲有色。正所謂爛船都有三斤釘，呢場開平手盤，主隊瑞典捧得過。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。