校友F上次在置地廣場唐人館吃午飯，講到佢要逆市開辦旅行社，正在申請牌照，今個星期二校友Y搵埋校友F、紡織B與左丁山到紅磡嘉里酒店七樓中餐廳紅糖吃午飯，試吓新派廚師手勢，校友F話牌照已經到手，餐飯吃得更高興。我哋四個人一於叫點心幾款，加一碟蟹肉伊麵，都係「紅糖」嘅經理Isaac介紹嘅招牌菜，呢位經理認真眼利，自動走埋嚟介紹自己及酒店餐飲部副總監Andy，熱情介紹「紅糖」之拿手點心，態度之積極，在其他餐廳比較少見。於是我哋費事睇menu啦，一於聽Isaac點，吃過後三位校友一致舉起大拇指，問我意見如何，左丁山認為幾有創意（燒鵝酥、紅米蝦腸粉），其他味道亦佳，似乎勝過同屬嘉里集團嘅香格里拉酒店之「香宮」與「夏宮」，呢度還有180度北角海景可睇，香宮夏宮難以比擬。
香港人近日到處講特朗普，前一日在九福，呢日在紅糖，皆聽見一啲女士大罵特朗普，話佢搞搞震，可見香港人幾重視美國對香港有何影響。是日清晨得知美國財政部點名制裁四個與國安法有關聯人士，即港澳辦副主任鄧中華、中央駐港國安公署副署長李江舟、警務處副處長（國安）劉賜蕙及國安處高級警司李桂華，究竟制裁有無作用？一位記者老友早前與外國外交官在中環街頭相遇，閒談幾句，外交官話制裁只係姿態，表示美國政府「注意到你」並且公開點名，令佢地若干金融交易不方便啫，實際效用要視乎被制裁者有幾多美元交易而定！講得輕描淡寫，但若果被制裁者擁有不少跨國資產呢？
校友Y等更關心新亞新聞系校友蔡玉玲，做調查報導記者做到畀警察拉，以前好似未見過。鏗鏘集係港台節目之寶，公信力極高，能夠擔任鏗鏘集編導，一定係經驗豐富，頭腦慎密之傳媒人，並非心口寫個勇字，橫衝直撞之輩，故此鏗鏘集能在國際上屢屢獲獎，為香港爭光。鏗鏘集編導之中，新亞新聞系校友蕭景路（已故）早年為鏗鏘集立下汗馬功勞，已退休之蔡貞停校友亦表現出色。今有21世紀校友蔡玉玲因「721誰主真相」被拘控，特區政府不准港台為她提供法律支援，不知天理何在，唔通要合約僱員帶律師費返工？