【名家足路】
【對決場次︰瑞典vs克羅地亞】
上星期《一燈決》推介馬德里體育會上盤，輕鬆贏4:0，一啲都唔意外，套用另一位名家守丹口頭禪：「基本嘢」。今周國際賽期，《一燈決》第二回交手就揀咗星期六歐洲國家聯賽嘅比賽，由瑞典主場鬥克羅地亞，我就撐硬克羅地亞，夠膽你哋就去跟燈神。
瑞典冇咗伊巴謙莫域就「甚麼也不是」，唔通真係信個大台二、三線藝員所講：「我最期待嘅聯賽係瑞超」咩。瑞典玩到今時今日，仲要靠施巴斯坦拿臣呢位瑞超兵，講真佢當打個陣，都只不過係英冠料，係就係有啲遠射腳頭，處理罰球都叫有水準，但速度就實在好慢，家陣35歲仲點靠佢。國家隊斷層好嚴重，老鬼好似馬古斯貝治、艾卡度都見晒底，名門之後佐敦拿臣算叫做係新星，不過家陣喺俄超都只係不過不失，真正上得大枱，只得曼聯中堅域陀連迪路夫。以瑞典歐國聯4戰全輸兼且只入得1球嘅賽績而言，今次即使有主場之利都係要唔過。
冇錯，克羅地亞拎完世界盃亞軍係沉咗一輪，歐國聯一開始又唔係好順，連續輸畀葡萄牙同法國，中場莫迪歷又發功過度，對上1、2年都幾沉，連皇馬正選位置都不保。不過以佢年紀咁大，有養生足球踢吓，反而唔係咩壞事。整體球員級數，克羅地亞亦都超瑞典幾班，國際米蘭孖寶波索域、比列錫、車路士中場高華錫等，今季都有唔錯表現，分組賽唯一勝仗，就係主場2:1擊敗瑞典。唔好介意上場友賽作客3:3土耳其戰果，始終唔係打真軍，大半隊主力都冇份，杜馬高維達確診武肺影響唔大，今場嚟真就信得過。
文：牽牛
《一燈決》係今季新欄目，由上月擂台盟主同上月燈神拗吓頸，睇吓讀者信邊個。