無綫前娛樂主播林子博的愛妻董燕君（Shirley），去年確診罕見癌症「平滑肌肉瘤（腹腔）」第四期，Shirley上月21日不敵癌魔病逝。子博和家人昨日在紅磡萬國殯儀館為亡妻設靈，今日上午9時進行大殮，隨即辭靈出殯，並於鑽石山火葬場舉行火化禮。Shirley離世前簽紙捐出眼角膜遺愛人間，受惠者為一男一女，醫管局昨日送上感謝狀致謝。
子博昨日一早到殯儀館打點，靈堂內佈置簡潔，牌匾寫上「永遠懷念」，遺照前擺設三個心形花圈，子博的花圈放在正中，上面寫上「永遠愛你」，兩邊則放有一對兒女的花圈，子博陪子女在靈前跪下送別母親。多位圈中人包括黎芷珊、馬浚偉、陳國邦與太太羅敏莊、江美儀、袁文傑、黎瑞恩及林盛斌等昨日到靈堂致祭，曾向子博及Shirley送暖的古天樂、薛家燕及汪明荃、好友王祖藍、田蕊妮及杜汶澤、方平及鮑起靜等則送上花圈。無綫娛樂新聞台則僅送花圈，並未有安排攝製隊採訪早前慘被辭退的子博。
子博昨午在靈堂外接受訪問，他表示由於沒有宗教信仰，故跟隨外父外母信仰，採取佛教儀式設靈。靈堂內播放着陳百強歌曲《深愛着你》，子博說：「太太好鍾意呢首歌，臨走前同我講過希望走嘅時候，靈堂可以播呢首歌。之前有諗過係咪想我唱，但佢話我唱得難聽。」提到太太的遺願，他說：「佢好想睇住仔女長大，佢做唔到，我去繼續。」
至於一對子女情況，子博指他們很快回復狀態：「佢哋好快做返小朋友嘅嘢，冇話好唔開心，反而我自己近日諗係咪要搬屋，因為喺屋企觸景傷情，事件相隔一個月自己仲未平復，要諗方法解決。」子博講起不禁眼濕濕，不過他提到子女好生性：「家姐摺金銀衣紙時，好叻同細佬講『今日我哋唔好嗌交』，平時佢哋成日會嗌交。」子博亦表示希望借工作忘記傷心事。他又多謝不少前輩送花圈及鼓勵，包括古天樂和汪明荃等，並透露現時經濟狀況暫時冇問題：「錢財身外物，唔會諗住，仔女係太太留畀我最好嘅禮物，會以佢哋為先。」
江美儀透露在亞視年代已和子博相識，見證兩人結婚、生仔，她說：「好可惜，Shirley太後生，細仔仲咁細個就冇咗媽媽，見佢一對子女情緒OK。」至於子博經濟上有否負擔？美儀說：「佢冇直接講，見佢都有工開，呢個世界肯做唔會餓死人，相信佢會為一對子女努力積極搵錢。」
