人大常委會聯同港府前日DQ四位民主派立法會議員，更引發民主派立會議員總辭，特首林鄭月娥在記者會上不禁喜形於色，因為她終於不用面對民主派立法會議員批評，立會內也再無人可以「阻頭阻勢」。但有政界人士指，其實民主派離開議會，表面似對港府及建制派是好事，「但有時輸贏唔可以睇一時、睇表面，真正蝕章可能係政府同建制派」。
該政界中人指，表面上立會沒有民主派後，港府及建制派將順風順水，但他指同樣地，以往香港面對的問題，經濟是否可以搞好、抗疫會否出問題，「冇得再鬧民主派議員玩政治、拉布、拖後腳，所有責任都要由政府同建制派承擔」，這些問題也是親政府市民最關心，「日後政府、立會做唔到嘢，班藍絲冇得鬧民主派，咪鬧建制」。
他又指立會內部份建制議員平日也是靠鬧泛民出位，「連有啲建制派自己都話，有啲人靠鬧泛民為主，文件唔睇、政策又唔跟，𠵱家冇泛民畀佢哋鬧，真係唔知佢哋留喺到仲有乜可以做」。
至於民主派，該政界中人稱，不少民主派人士也對他說，北京DQ四位民主派立會議員，「其實係為民主派困局入面，畀咗條生路佢哋走」，因為立會復會個多月，民主派在主席梁君彥有權用盡剪布下，「拉布效果越嚟越低、民主派議會抗爭空間越嚟越窄，當日決定延任承擔政治壓力亦越嚟越大」。
可是，北京突然出手DQ民主派立會議員，有民主派人士向該政界中人形容「好似突然開條路畀民主派」，可以用總辭反守為攻，「如果唔係，民主派現時好難打總辭牌，未到大灣區投票議案上，民主派已被陰乾」，至於北京、建制威嚇總辭議員不能再參選，該民主派人士反問，「留喺立法會你估又會畀你選咩？咪一樣有其他藉口封殺！」
季陶
周一、三、五刊出