周中我變咗外太空飛碟咁發熱發亮，燈死神戶勝利船同名古屋鯨魚，不過相信燈力都有用完嘅一日，有信心開始回復正常。歐洲聯賽繼續因為國際賽暫停，好彩仍然有日職，我嘅心水有兩隊，一隊FC東京，一隊神户勝利船，不過今次要神戶對家。
亞冠盃月尾就會重開，玩法好似歐聯咁，參賽球隊集中喺卡塔爾，FC東京同神戶勝利船，都將會第一場就鬥中超球隊，大戰前夕，日本人一定好有計劃，作出賽前部署，所以會用客觀分析兩隊嘅情況。FC東京，今季都可以叫做穩定嘅一隊，可惜因為川崎前鋒太勁，冠軍就唔會有東京份，但降班又唔輪到佢，所以要好好把握呢次亞冠嘅機會，復賽第一場就先會對FC上海，因為無作客主場關係所以好相信會踢得較穩陣，咁關下星期日作客名古屋鯨魚咩事?絕對關事，如果跟足賽前部署，今場FC東京一定練防守反擊，對名古屋就係演習嘅好機會，所以好簡單，「細」就會係呢場嘅演習結果。
至於另一隊神戶勝利船，亞冠盃首戰將會對住中國最強嘅FC廣州，分組賽神戶已經有六分在手，同樣地佢哋都需要一套防反戰術去應付恒大，但分別在於下星期日嘅對手，只係主場對湘南比馬，實力真係好一般，最搞笑係對方先會踢防反，神戶練兵效果可能不似預期，亞洲盤仲要讓到半/一，兩頭唔到岸，要下盤反而穩陣，博班人要兼顧兩邊戰線，開始喺聯賽留力，信我，燈完㗎啦！
文：黃耀富