北京出手DQ民主派四位議員，噚日好多建制派搞活動，其中有七個親共團體去咗政總開香檳慶祝同感謝人大常委會喎！佢哋將香檳灑到一地都係都算啦，八方發現呢班示威人士四人一組咁去影相，根據警方話要共同目的係示威就算係聚集，呢度加加埋埋20幾個人，差人應該向佢哋出返張告票喎！
呢堆團體包括有「德愛誠」、「市民心聲」、「和諧力量」、「中華傳統文化交流協會」，相信一般人都冇點聽過㗎啦。一眾大媽、大叔、呀婆、呀伯帶晒簡體字標語，話「19個攬炒拉布垃圾 議員一個都不能留」喎，點解「議員一個都不能留」？咁班親中派議員點算？睇真啲，原來係橫額將兩句分開咗！相信建制派議員唔會責怪嘅。
警方喺呢啲時候就非常克制嘞，除咗唔簽限聚令告票之外，無論請願人士係Chok 香檳，噴香檳，定係篤爆氣球，都冇擔心自己會受襲擊，仲溫馨提示佢哋，香檳唔好射入政總，垃圾要執好，排好隊，八方都係第一次見到警方咁重視自律呀！
李八方