喺今季英超爭取衞冕嘅利物浦認真黑仔，主力輪流傷病，最大鑊係後防絕對重心華基爾雲迪積克（VVD）季初重創，基本上已肯定收「咧」，領隊高普喺禮拜三再受打擊，另一位主力中堅祖高美斯返英格蘭國家隊報到，操練嗰陣膝部受重創，而紅軍喺禮拜四透過官網宣佈，祖高美斯已經接受咗膝肌腱手術，雖然未有復出時間表，但預計難再喺今季披甲，睇嚟都係要「收咧」。
本身已經唔夠中堅嘅紅軍，目前得番一位正宗中堅候命，加上英超並冇緊急法可以應用，到下年1月轉會窗重開前，就算簽到自由身球員都用唔到，喺未來個幾月，高普求神拜佛唔好再有後防受傷，期望要站起來嘅年輕守將、同埋即將復出嘅法賓奴泰華利斯可以撐住先。
新季開始咗大約兩個月，但紅軍已經有超過10位1隊球員受傷或感染武肺，好彩嘅係當中艾利臣比加同沙迪奧文尼等小休後都已經復出；而傷勢嚴重嘅VVD就預計要下季先可重返球場，上輪受傷嘅右閘阿歷山大阿諾特，都要休戰大約一個月。高美斯代表英格蘭備戰國際賽，喺禮拜三操練時膝部受傷，雖然確實傷情有待檢查，但據報非常嚴重，或者要整季休戰。
目前紅軍傷兵名單裏面，6位球員有4人係後防球員，中堅荒最令高普頭痛。目前1隊只得番啱啱喺上輪復出嘅祖爾麥迪比1位中堅，加上兩名年輕守將里斯威廉斯同尼達利菲臘斯候命；好消息係經常串演中堅嘅法賓奴，有機會喺國際賽期後復出，非常情況甚至要由佐敦軒達臣、占士米拿甚至左閘安德魯羅拔臣客串做中路守將。
情況如履薄冰，紅軍防線喺未來個幾月非常險峻。事實上𠵱家英超冇任何轉會相關條例可以幫利物浦，之前講過目前仍有前皇家馬德里守將加雷等自由身球員，不過就算簽到，都要等下年1月轉會窗重開後先可以註冊再喺英超上陣。英超幾年前曾經有「緊急借用」條款，等球會喺轉會期外簽球員應急，不過只限門將位置，但今時今日已經廢除埋。換言之紅軍要有新兵幫手，目前只可以瞄準目標，點都要等下年1月。
據報上季幫德甲拜仁慕尼黑成為三冠王嘅功臣阿拉巴，同球會傾續約談判破裂，紅軍希望可以羅致呢位喺今季後約滿嘅奧地利守將。不過紅軍如果想阿拉巴1月報到，就仍然要向拜仁科水，拜仁知你急要人，就算阿拉巴剩半年約，叫價肯定唔會低。
除咗高普，曼城領隊哥迪奧拿都頭痕。曼城都有中堅喺國際賽期受傷，尼敦阿基喺周三國際賽代表荷蘭嘅比賽拉傷大腿，又要休戰一段時間。
