肥佬黎在星期日專欄加多兩句P.S.，講CIAK之pizza，全港最正，碰巧公關靚女E、俊男H請左丁山吃午飯，竟然就係訂咗CIAK，於是午餐點咗pizza餐，大概看看周圍，好多客人都係食pizza，呢間好似係pizza專門店咁款。係唔係全港最靚呢，唔敢講，美味就確係事實。左丁山最近帶咗孫女去PP第三期對面皇后大道東之Grappa’s食pizza，印象相當好，小孫女尤其搶吃一款名叫Pizza no.2，細小薄餅，唔輸蝕得過畀CIAK（置地廣場三樓）。
CIAK屬麗新飲食集團，大老闆係林建岳，在置地廣場開業以來，生意一直好好，午飯時間座無虛席。究竟CIAK係乜意思？問過餐廳R，佢話意大利一本最暢銷之電影雜誌就係叫做CIAK，英文意思就係拍電影時所用之拍板（clapperboard）。香港之意大利名廚Bombana加盟麗新開辦8½之時，亦開多一間比較平民化嘅CIAK。顯然就係心中有電影、電影就係《8½》（港譯八部半），係已故大導演費尼里之傑作。
在置地廣場食pizza，令左丁山憶起舊事。記得香港由怡和集團首先引入Pizza Hut，好似係1970年代末，當時Pizza Hut設於置地廣場地庫，即今日咖啡屋Fuel（近大道中/雪廠街一邊）之所在地。餐廳係長方形，由雪廠街去到畢打街，中午爆滿，一位難求，日日門口有人排隊等候。但後來置地廣場租金愈來愈貴，同一集團嘅Pizza Hut亦負擔唔起租金，搬走咗，以後逐漸變成平民化，大眾化食品，再難打入置地廣場了。左丁山由此認識Pizza，想唔到，1980年代中期，由銀行轉往直接投資基金工作之後，奉命研究Pizza生意，後來就投資入股泰國Pizza Hut，因為賺到錢，又問清楚怡和集團並未有中國華北地區之經營權，遂搵人穿針引線，帶泰國公司到北京開辦全國第一間Pizza Hut，北京合夥人要譯中文為「比薩餅」，開業於朝陽區澳洲大使館附近，點知道談判進展良好，將近注資之際，碰上六四，百事可樂集團即時擱置計劃，直至1992年左右先至開幕，已經唔關左丁山事咯。