周末繼續以國際賽為主，有留意本欄一向知我唔多鍾意玩，反而周六幾場英甲，搵到場好嘢；侯城今季由英冠降班到英甲，級數就明顯高一般英甲兵一籌，周六主場對伯頓，更可以乘人之危，三分穩陣，主W同上盤都捧得過。
好記性球迷一定對「老虎仔」侯城唔陌生，2008年升過上英超，雖然都係護級為主，都試過殺入英足盃決賽兼拎到歐洲賽資格，不過唔少中小型班一踢歐洲賽就走樣，侯城都唔例外，2015年降返去英冠，上年更加只得英冠包尾，又要再降去英甲。雖然侯城目前陣容唔算大名氣，不過由領隊麥肯接手，就用一批年輕球員，特別一對箭頭馬歷韋奇斯同路易斯樸達，加埋都係40歲，好氣好力加埋入成九粒。侯城嚟到英甲都算超超地班，開季10場贏7場排第5，因為少踢一場，今場贏波更有機會上第二，以海外博彩公司參考賠率，侯城W有1.55倍，讓半/一低水，未知足智彩點開盤，就算唔開「讓球」盤，主W雖然熱都算穩陣。
伯頓只排英甲尾二，上仗英錦標主場對富咸U21都贏唔到，真係弱過藥煲，開季至今作客都未贏過，3和3負之餘更累積失12球。更慘情係賽前傳出有數位職球員確診武肺，雖然冇開名，但點都影響球隊正常練習，今次預咗俾老虎咬。
推介完一場熱門，再整一場有啲分頭，梳士貝利主場對史雲頓，兩支下游球隊對碰，雙方都冇咩贏波把握，梳軍主場未贏過，只得2和3負，不過史雲頓又唔係叻，各得一分合理，「主客和」揀個D。
文：Goal進
