近期相當多立立雜雜嘅生科股上市，當中唔少講到幾優質都好，都只係威得嗰個暗盤時段，一上市即刻見光死。揀選生科股，點都要做吓功課，首先睇吓佢有冇自主開發能力，近期已上市同將會上市嘅生科股裏面，大部份都係同海外合作夥伴共同研發攻大陸市場，有啲本身主打藥嘅市場都不太juicy，亦有啲主打藥本身市場唔係咁大，亦有啲海外夥伴本身喺美股都係低市值兼股價死吓死吓，遇正呢類股，基本上可以不理，估計上市後長期潛水。
比較唔同嘅係榮昌生物（9995）同藥明巨諾（2126），後者唔使講，CAR-T、藥明系、低市值，即使主打藥攻嘅市場規模細，但揸住3個賣點一樣炒得起，但長線純粹炒味濃。
榮昌生物有自主開發能力，創新藥泰它西普RC18主要醫治系統性紅斑狼瘡症、類風濕關節炎等，安全性獲肯定；RC48主要醫治胃癌、乳腺癌，喺中國進入臨床三期試驗或提交中國藥監局，亦獲得美國FDA突破性療法認定，獲得快速通道資格。市值320億左右，有膽喺螞蟻同期招股上市，可以話係近期唯一較可取嘅半新生科技股選擇，質素絕非嘉和生物（6998）、先聲藥業（2096）之流可以比較。
晉佳