現年63歲的「靚聲王」張偉文昔日體重高達260磅，惟近年受腰患、糖尿病及腳痛問題困擾，四年前跌至160磅，更要坐輪椅及靠枴杖代步。日前網民影到張偉文坐輪椅「落泊」街頭照，露出「筷子腳」，銀髮白鬚顯得蒼老。《蘋果》致電張偉文，他精神不錯，並透露目前瘦剩八、九十磅。
張偉文說︰「嗰日喺旺角俾人影到，我係瘦咗好多好多，着晒衫接近100，唔着就八、九十磅。」對於網民見他消瘦心酸，他說：「我肥嘅樣太深入，其實唔係短時間瘦，係正常慢慢瘦，不過近期瘦多咗，行動唔方便，冇郁動好容易食少少就飽，但健康冇大礙。」他指因腰骨唔夠力，出入要坐輪椅：「唔坐都得，但醫生話危險，斷埋腰骨仲衰㖭。」
問到有沒有人照顧？張偉文說：「冇呀，朋友義務照顧我。𠵱家喺旺角住護老院，佢哋照顧冇另外收費，化算啲，工作冇問題，只要預先約好，兩日前做運動，等身體好啲可以拍，經濟亦冇問題，有儲錢，頂得住。」上月張偉文出席記者會時，穿上外套和長褲遮掩未見太瘦，本來他長居深圳，因疫情返港入住酒店，豈料在洗手間跌斷腳，住了幾星期醫院，出院後好友方俊將他送到護老院照顧，免他獨居再生意外。
昨日方俊亦回覆︰「佢冇親人，惟有送佢去護老院，初時佢唔肯去，但因為試過幾次翻車，年半前去威爾斯覆診時又跌親，入院發現腦有瘀血，做完手術後開始腦退化，記憶力差有時會有啲錯亂，獨居好牙煙，加上做完腰椎手術影響雙腳冇力行，肌肉開始萎縮，所以你見佢對腳有啲拗咗，佢以往提攜過我，我在生一日都會照顧佢終老。」
