民主派立法會議員前日總辭，代表醫學界的陳沛然同熱血公民嘅鄭松泰未有跟大隊走，網民前日已經諷刺鄭松泰唔肯辭職，點知港澳辦唔知係咪嫌泰博未夠死，噚日發稿砌泛民之餘，不點名讚泰博等留低嘅人係「明智之舉」，仲要「值得肯定」。泰博獲港澳辦「認證」、「點讚」，即時令網民起哄，終於可以做國師陳雲口中嘅「中共座上客」。
港澳辦噚日用發言人談話名義發稿，除咗例牌對民主派議員總辭表示嚴厲譴責，話佢哋同北京頑固對抗、對中央權力同《基本法》權威公然挑戰呢啲老生常談外，發言人仲話有一部份被標籤為「反對派」嘅議員冇被綁架上「總辭」戰車，「而是選擇繼續履行議員職責，這樣的明智之舉值得肯定」。
泰博獲港澳辦「點讚」，立即引起連登網民起哄，有網民揶揄泰博終於獲中共「認證」，以後可以做「忠誠反對派」，「秦（泰）博成為了全立法會最大反對黨，厲害了我的博」，亦有人寸佢「有成十萬 唔做正傻仔啦 同你地鬥氣？利益最緊要」、「食完美心正式歸順中共」，仲有人話泰博終於可以做國師陳雲口中嘅「中共座上客」，同建制同船了！
咁又難怪，事關國師喺佢fb貼文撐泰博，「好彩鄭松泰議員的參選提名有效，香港特區政府默許他是堅強支持一國兩制和愛護香港和祖國大陸的好議員」。有網民去泰博fb洗版鬧佢，不過佢一於少理，只係貼佢噚日係立會發言嘅報道當回應。
李八方