羅拔利雲度夫斯基今年帶領拜仁慕尼黑贏得五冠王嘅榮譽，只可惜今年度嘅金球獎因疫情關係取消，令「弗爆」嘅羅拔仔無緣贏得獎項。佢喺上季德甲聯賽，為拜仁上陣31場射入34球，連續三季贏咗金靴獎，上個月仲當選UEFA年度最佳球員。貴為「歐洲之王」嘅首席射手，羅拔仔大有機會贏得今年嘅金球獎，可惜鑑於今年情況特殊，金球獎要停辦一年。好彩，羅拔仔有波蘭同鄉兼當地著名饒舌歌手Quebonafide，為佢送上一個用Lego積木砌成嘅金球獎獎座。羅拔仔喺ig貼出合照仲寫話：「多謝你為我砌咗個獎盃。」唔少球迷喺帖文留言為佢抱不平，而佢隊友艾方素戴維斯都話：「今年佢咩比賽都贏過，佢係最出色嘅射手同球員。」