民主派立法會議員總辭，但代表醫學界的陳沛然同熱血公民嘅鄭松泰未有跟大隊走。陳沛然一向係中間派，再加上係功能界別，要同業界交代，唔走都合理，至於泰博一向話自己唔係泛民，唔共同進退亦唔奇，但好多網民噚日就繼續追擊泰博，除咗揶揄熱血成日話激，今次仲溫和過泛民外，仲有人拎佢2017年叫泛民總辭寸佢，為乜𠵱家有得總辭佢又唔跟？
話說2017年法庭裁決羅冠聰等四位議員宣誓無效，失去議席，當時鄭松泰喺fb發帖話，「總辭吧！這個議會沒有存在的意義」，有連登仔拎番呢個帖出來寸佢，揶揄「佢叫人總辭啫！無話自己會辭埋一份啊」，又有連登仔講反話，叫大家可唔可以鬧少泰博一句，「松泰要供樓，同應付陳雲國師生活基本開支，一個月十萬出面搵唔到」，仲有人笑熱血公民終於做到立法會內，真正民主派第一大黨！
至於泰博點回應外界批評？佢喺fb發帖話：「議會嘅不公義，由延任一刻已經好清楚，希望公眾明白，政治抉擇係舉手不回」，即係佢講明入咗延任議會就唔走，市民接唔接受佢都唔變。
李八方