向來言論出位嘅美國女足隊長娜賓露日前接受BBC訪問，炮轟富甲一方嘅英超球會冇投資落女子足球度：「英格蘭女子足球情況同美國差唔多，因為面對投資不足嘅問題，遠遠落後男足。家吓2020年啦，英超成立咗幾耐？我哋幾時先見到好似曼聯咁嘅大球會開始投資女足？坦白講好可恥囉。」不過娜賓露批評曼聯2018年先有女足隊嘅言論就俾紅魔迷插到飛天，話上世紀70年代尾已經有隊非官方嘅曼聯女足隊，去到2001年，仲正式成為曼聯女足隊。可惜美國商人格拉沙家族2005年入主曼聯後，因為面對龐大財政壓力，曼聯女足隊先解散。結果要到2018年，曼聯女子足球隊先重生，目前以6戰5勝1和不敗成績，仲排喺女子超級聯賽榜首。