曾經效力過阿仙奴同巴塞隆拿嘅喀麥隆中場桑治近年幾乎喺球壇消失，呢位33歲中場近日終於出走歐洲，轉投東非小國吉布地嘅一支球隊，正式告別歐洲球壇。桑治喺2018年由俄超球隊魯賓卡山轉投瑞士球隊錫永之後，過去兩年都冇乜為球隊上陣過，今年3月桑治因為唔肯減人工，最終俾錫永裁走，轉眼間就咁失業咗超過半年。據喀麥隆傳媒報道，桑治近日終於搵到新東家落腳，不過就唔係歐洲球隊，而係東非國家吉布地一支叫Arta Solar 7嘅球隊，據講桑治仲獲得一份長達兩年嘅合約㖭。不過桑治今次喺呢支球隊就冇得再齋坐𢭃人工喇，事關佢除咗要落場踢波之外，仲要兼任埋球隊嘅青年軍教練，都咪話唔忙。