上個星期，由11月2日開始，每次與朋友在吃午飯，甚或在WhatsApp交談，話題都離唔開美國大選，一路講到昨日，已知拜登當選，還是要談落去！大家都有興趣知道特朗普唔肯認輸，還有甚麼招數可用，會唔會大膽到下令司法部責成FBI去拘捕拜登個仔亨特，指佢涉嫌收受中國及烏克蘭賄款呀？特朗普要到明年一月中以後先至要準備離開白宮，還有接近兩個月可以發號施令，令拜登難堪嘅。如此行為當然絕非gentleman所為，但特朗普已經決心抵制，唔會介意畀拜登選民鬧多啲嘅嘞。
與虎媽A及老總G在九龍福臨門飲茶，虎媽A話據佢所知，女拔萃有不少學生退學去英國，有插班生空缺。點解近來有幾間名校招收插班生？答案就係學生被家長送走，絕大部份係去英國。過氣特首CY對此有一個講法，話本地學校充斥黃師，輸送失德思維，受校長包庇，故此家長為兒女退學。虎媽A大笑：「你可以問CY，女拔校長係藍絲定黃絲？都費事講！」如拜登話齋，美國不應分Blue States，Red States，同屬United States；香港咁細，又何必分藍黃？不過CY最鍾意劃清界綫，劃分敵我，你奈佢乜何？
食完九福點心之寶蝦蛟，讚口不絕之餘，虎媽A問：「點解你好似係擁拜登？」其實因乜擁拜登，不擁侵侵呀，睇數據嘅啫；選前各大民調都睇好拜登，一致認為侵侵落後八至十個百分點，在搖擺州民調，拜登亦以三至五個百分點領先，實際啲睇，即使民意調查有誤差，誤差範圍在5個百分點之內，拜登仍然可以贏點數，氣走特朗普，不以任何人之主觀或感情而轉移。左丁山一直私底下認為拜登會贏，原因如上述，特朗普之敗，係輸畀自己過份輕視新冠肺炎疫情，最初話相信中國，後來發覺唔掂，大罵中國肺炎，但又唔信科學家，愛理不理，搞到投票前有近千萬人確診（包括佢自己），近23萬多人死亡，猶自吹牛話疫情將盡，於是雖有個人魅力，得票逾七千一百萬，但拜登得票更多，有七千五百幾萬，仲有乜好講！