曼聯上禮拜六英超作客以3:1擊敗愛華頓嘅比賽，格連活特未入選大軍名單，當時嘅理由係呢位英格蘭前鋒身體抱恙。但據報「綠木」喺紅魔上禮拜嘅操練表現已經不如人意，其懶散態度仲惹親中場般奴費南迪斯（B費）。領隊蘇斯克查就話隊波就係需要B費咁有火。據報上禮拜五嘅紅魔操練入面，B費向「綠木」傳出一球，但後者冇上前追波，B費即刻扯火，但紅魔澄清佢哋冇爭執。蘇B解釋：「格連活特夏天喺效力英格蘭大軍嗰陣犯過錯，然後成個英格蘭嘅傳媒都針對佢，但其實佢訓練從來唔遲到，都唔係球隊嘅問題來源。
成隊波喺B費嚟到之後就開始有進步，佢好勤力、好謙虛、願意冒驗，具備做X-factor嘅材料。你就需要咁樣嘅角色，喺一隊波入面需要有好似佢咁嘅人，而我哋隊已經有。我哋係支好後生嘅球隊，佢喺呢方面幫咗我哋好大忙。」另邊廂「連美斯」連格據報就炒咗「吸血經理人」拉奧拿，雙方合作唔夠一年就分手，曼聯青訓出身嘅連格，至今已為紅魔一隊上陣超過200場，雖然蘇B仲未決定佢嘅前途，但相信唔會白白將佢放走。而傷兵方面，左閘勞基梳爾因為腿筋受傷，需要休戰一個月，嚟緊將會錯過三場英超賽事，同埋三場歐聯分組賽，巴西左閘阿歷士迪尼斯將有望頂上。
