最近好多網民因撐特朗普定拜登做美國總統開大片，但估唔到陶傑同蕭若元兩位才子，都間接因為呢件事開火，燒山鬧陶傑係「人渣」，陶傑就話要告燒山。
其實冰封三尺非一日之寒，佢兩人近日因美國總統大選問題曾展開罵戰，陶傑曾喺節目嘲諷某燈神搭沉船「燈」死特朗普，矛頭直指燒山，燒山隨即喺自己網台反罵陶傑係「人渣」，又指佢哋不和始於2014年因逃難到歐洲敍利亞難民新聞引發爭論，指陶傑曾稱「可以叫黑幫用手槍機關槍掃射難民」，怒罵這種說法不可接受。
燒山上周六喺YouTube頻道以「乜嘢係人渣？陶傑點解係人渣？」為題，親解自己同陶傑結怨，除咗難民論惹火頭，燒山疑道聽塗說，同引述陶傑早年喺英國嘅朋友嘅信件， 指控陶傑曾喺英國求學期間嘅種種不是，但燒山未有提出實質證據，仲將相關YouTube影片轉為私人影片。
到前晚陶傑喺電台節目《光明頂》還拖，話要控告燒山誹謗。八方噚日問陶傑係咪真係要告已定居台灣嘅燒山，佢短訊回應：「正在草擬律師信，這是第一階段針對其誹謗言論下一步正在與律師商議中。未有咁快決定。但律師信係一定會寄送的。」至於燒山目前身在台灣，陶傑補充話：「律師話有辦法送抵。」陶傑會否考慮喺台灣入禀告蕭若元誹謗，抑或喺香港入禀？假如香港成功告入，係咪可以喺台灣追索賠償時，陶傑回應：「一切可能都在考慮中。」陶傑又補充話︰「香港公民係可以照樣有權告入台灣的。佢作出此誹謗行為時人在台灣。」
李八方