阿仙奴禮拜二透過社交媒體公佈，喺上月裁員行動接到大信封嘅吉祥物「阿仙龍」（Gunnersaurus）已經重返阿聯酋球場開工。有網民留言話希望佢着番「恩人」奧斯爾嘅10號球衣，亦有口痕友懷疑呢條龍好有可疑，其實就係「奧燒」扮嘅。
武漢肺炎疫情令到阿仙奴嘅收入大減，加上閉門作賽根本唔使點搞氣氛，所以槍手上個月就向Gunnersaurus開刀，將扮演「清潔龍」長達27年嘅員工Jerry Quy炒咗，不過好多球迷都鬧爆兵工廠不近人情，已經入咗雪櫃大半年嘅中場奧斯爾都睇唔過眼，講明要做「白武士」出手打救，只要自己一日留喺阿仙奴，都會孭起出糧畀「清潔龍」條數。
阿仙奴呢隻吉祥物之所以會俾人叫做「清潔龍」，係因為佢同香港食環署大使「清潔龍阿德」好鬼似樣。阿仙奴方面並冇交代「清潔龍」嘅人工，係咪真係喺奧燒份糧入面扣，但《每日郵報》就話今次扮演「清潔龍」嘅並唔係Jerry Quy。雖然Jerry之後都會有機會扮番「清潔龍」，但將要同其他人輪流開工，有網民就話其實隻嘢根本就係奧斯爾扮嘅，因為領隊阿迪達唔肯派佢落場，所以就求其畀個新崗位佢，好過白出嗰35萬鎊周薪。唔少槍迷一見到「清潔龍」復工，都話希望已被雪藏超過八個月嘅奧燒都可以盡快重返球場，亦有人建議「清潔龍」着番件10號波衫撐吓「恩人」喎。
奧斯爾繼舊年年底喺社交網站出po，批評中國政府打壓新疆維吾爾人後，近排又喺網上聲援被囚禁喺新疆集中營嘅維吾爾人，結果再次遭內地封殺，阿仙奴亦即刻「跪低」將佢踢出英超大軍名單。雖然阿迪達一直堅稱係因為「足球原因」棄用奧燒，但呢個講法又真係好難令人信服。呢位32歲中場禮拜二除咗喺twitter恭喜「清潔龍」復工外，仲喺ig po咗幾段自己單獨操練體能嘅短片，講明自己隨時可以上陣。
眼見阿仙奴越踢越沉，前隊長阿當斯亦忍唔住加把口，佢認為槍手𠵱家最缺乏嘅就係創造力，奧斯爾冇得出場只係因為阿迪達嘅踢法太着重防守。阿當斯仲爆料話，其實阿仙奴本來已經同啱啱首次入選英格蘭國家隊嘅祖迪比寧咸（小圖）傾好晒加盟條件，只不過係當時啱啱接任體育總監嘅伊度唔識貨，煞停咗呢單交易，先至令多蒙特有機可乘，搶走呢位17歲新星。