中超嘅新聞特別騎呢，現年33歲嘅中國國腳于漢超今年4月俾人影到企圖將座駕車牌上嘅「E」字改成「F」字，意圖避開廣州市「開四停四」嘅規例。條片喺網上瘋傳，結果除咗行政拘留15日之外，佢仲俾廣州恒大解僱。日前佢接受《南方都市報》專訪回應事件。佢表示冇諗過自己會突然離開廣州，而被問及佢有咩想同影低罪證嘅球迷講嗰陣，佢就認為對方可以事先提醒佢，咁就可以避免佢俾球會「炒魷魚」：「係我衰先嘅，但如果嗰陣佢直接行埋嚟同我講，而唔係直接將條片擺上網，可能會好啲囉。」主持又問佢會唔會好難接受恒大隊規時，佢就話：「我只可以話，我唔係第一個觸犯隊規嘅人，亦都冇可能係最後一個。」