圈中有啲女星入行為釣金龜婿，目標明確係好事，但有時未釣到已玩謝自己。好似「麗絲」從未間斷去識富二代、富三代，可惜煲極都係冇米粥。其實麗絲多年前有個唔錯嘅男友，不過佢唔甘心為一棵樹放棄成個森林，背住男友偷食富二代，點知東窗事發，最後搞到兩頭唔到岸。但麗絲不嬲都係戰鬥格，收拾心情又去搵獵物，好快就識咗個筍盤，對方唔止家底厚，自己都有實力創業，不過公司嘅財政大權就交畀阿媽睇住。
Jessie有位朋友同呢位筍盤男合作過，有次去佢公司開會，行入大門口就見到麗絲坐喺接待處梳化，原來佢當時仲未算係人哋女友，但就喺公司想擺事頭婆款。後來成班人開完會，麗絲就發揮佢僅有嘅演技，同眾人打招呼。可能佢以為開會嘅人都係非富則貴，一於有殺錯冇放過，可惜大家當佢透明。不過最精采莫過於筍盤嗰位霸氣嘅媽媽，一見到麗絲就好嬲咁問：「你上嚟做乜呀？」擺到明唔高興。
其實霸氣媽唔like麗絲都有原因，唔單止知道佢係拜金女，又同唔少有錢人有一手，話晒自己家族叫做有頭有面，阿媽為個仔好，所以出盡力棒打鴛鴦。
撰文：Jessie
本欄逢周三刊出
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
