希拉莉與賀錦麗，邊位女士更醒更叻？逐項比較嘅話，其實希拉莉應該贏幾個馬位。論學歷，希拉莉畢業於Wellesley，後入耶魯法學院，一定係讀書尖子；賀錦麗畢業於Howard（黑人大學），在加州州立大學Hastings分校讀法律，講quali，差希拉莉好遠。論資歷，希拉莉做過總統夫人8年，參議員8年、國務卿4年，而賀錦麗只係做咗參議員4年，於國內政治、國際政治及外交歷練方面，與希拉莉差距甚遠！
不過唔好理，今日嚟講，希拉莉於2016年輸咗畀特朗普之後，已是明日黃花，被迫淡出政壇。賀錦麗以南亞裔黑人身份，竟然打破玻璃天花板，成為美國及史上第一位女副總統，更因拜登年紀已大，一旦有不測嘅話，賀錦麗隨時成為白宮第一位女主人，千古垂名。所以話呢，年年讀書考第一，入到頂級名校，仍然不敵一命二運三風水，賀錦麗在特朗普遭遇上極差社會經濟環境之時，因緣際會被拜登揀中為副總統拍檔，咁就直衝雲霄。
拜登亦有官命，係歷年來第一位不是長春藤大學畢業生做總統，老布殊係耶魯畢業生，克林頓係Georgetown、耶魯加牛津，小布殊係耶魯加哈佛，奧巴馬係哥倫比亞加哈佛，特朗普就係Wharton，以上五位總統皆出自美國最頂尖名校，拜登就在University of Delaware畢業，入Syracuse讀法律，自不然學歷差咗幾皮，但做人勝在有韌力，從一個小州脫穎而出，做參議員做咗36年，今年11月20日就78歲，居然幾經辛苦之下，擊倒特朗普成為美國第46任，歷史上最老之候任總統，講古仔就幾似姜太公八十遇文王。
故事嘅教訓係乜？一句話，英雄莫問出處，香港人普遍羨慕名校，家長千方百計送子女到英國讀寄宿學校，或名氣國際學校，最終目的都係想孩子入哈耶牛劍史丹福啫！拜登賀錦麗話畀我地聽，做大事之人未必一定要讀名校，個人學習與毅力更重要，賀錦麗靠單親媽媽養大，拜登出身一個家道中落家庭，兩人成長時期都經歷過酸苦辣，全靠個人能力先至可以在精英充斥之美國政壇爬出頭來，最後登上高峰，拉倒贏在起跑線之富豪公子特朗普。