抗疫咁耐，港大微生物學系教授袁國勇就陪住大家咁耐，唔使問大家一定鍾意見佢多過見林鄭同一眾「問責」高官，起碼教授敢言、講人話。作為全球著名嘅微生物學專家，袁教授對細菌、病毒瞭如指掌，噚日就因為八年前發生嘅DR「毒針」案嚟法庭作供，法官一嚟就叫佢除口罩，教授大感愕然問：「Remove? It’s a bit dangerous.（除咗佢？有啲危險喎。）」
其實因應武漢肺炎疫情，司法機構喺高等法院法官、控辯雙方律師席前，同埋證人枱位置安裝咗透明膠板，防止口水飛沫周圍噴。教授噚日宣誓坐低，即刻就用枱頭嘅酒精搓手液仔細消毒對手，手指罅都捽埋。審訊就用英文嘅，法官張慧玲用手勢示意教授「Remove」口罩，教授呆一呆，問「Remove？」不過為咗陪審員可以觀察證人作供嘅神態，教授都惟有除口罩。
雖然除咗口罩，不過教授作供都有啲細聲，張官叫佢大聲啲，教授即刻聽話，但笑笑口話「我64歲，我老啦。」喂呀，教授你64歲都話自己老，羅致光話60歲先到中年咋，同埋你叫坐喺法官位嘅張官情何以堪，人家大你幾年㗎，所以張官都即刻笑住話：「You are not too old!」
教授之後同記者講，其實佢除唔除口罩就冇所謂，「我係驚我惹到你哋咋，我睇咁多病人」；佢仲話法庭防疫措施做得「OK喇」。
李八方