《暖男爸爸》監製戚家基日前接受《蘋果》專訪，原來他今次更是該劇導演及編劇。身兼三職，全因他不想妥協，他說︰「早期我做編劇先，但上到銀幕係改晒；到我做監製，電影公司同導演都有意見，最後都係改。所以今次我有主創權，會去到幾盡，憑直覺，將香港人有共鳴嘅擺晒落去。」Peter上一部劇已是2008年亞視的《勝者為王》，為何相隔12年才再拍劇？Peter謂︰「我覺得香港人欠缺一個治癒劇，香港人慘咗好多年，電視一路只係睇到啲爭家產、office搞笑、查big boss嘅戲，完全冇好日常、好庶民嘅故事。」
《暖》劇出現「connect」、「be water」等抗爭對白而被談論，Peter坦言︰「好多人問我係咪特登貼地啲，其實我唔係拍科幻片，唔使特登，我講香港人嘅生活，梗係有香港人嘅說話。有咁多人問我，可以睇返市面上畀你睇嘅嘢有幾離地，擺返街上啲人講嘅嘢喺劇入面，已經係成就，有少少可悲。」劇中出現幾位男角如強尼演Lantau、邵仲衡演的Roger都是賤男，Peter坦言有自己的影子，他說︰「人生中去到某階段，要回顧吓自己嘅經歷，好似自己離婚，做過啲好差嘅嘢，不期然會投射某個角色，對自己係治療。」
翻查資料，Peter早年曾做過銀行，及後放棄高薪厚職，轉行加入影視工作，先後擔任香港影業協會總幹事、有線電影台台長、香港國際電影節總監等，就連首屆亞洲電影大獎也是由他孕育出來。當年他在電影節工作時，為幫表現較好的下屬加人工被拒，毅然「劈炮」，他說︰「當時我打算扣自己人工，加落嗰位同事度都唔得。」他指香港的影視圈不應存在「見仁見智」的看法，他說︰「係差就差，𠵱家行業萎縮，係因為冇視野、冇guts。」