【娛樂人物】ViuTV劇集《暖男爸爸》播出以來備受好評，劇中飾演鄭中基年幼版本兒子「暴龍哥」的5歲童星Julian（JuJu），更因可愛爆紅，他開設Ig短短個多星期，已吸納七千多位followers。JuJu一直未有出席宣傳，早前他與媽媽及監製戚家基（Peter），一齊接受《蘋果》訪問。媽媽指JuJu拍劇兩天便改變慢熱怕醜性格，監製更說︰「佢坐喺導演位嗌action。」
撰文︰羅婉玲
攝影︰仇志中
話題劇集《暖男爸爸》中飾演鄭中基兒子暴龍哥的童星Julian，cute爆樣子十分搶鏡，被封為「暖男仔仔」的他，瞬間成為劇中的人氣王。自《暖》劇出街後，今年5歲的JuJu都未有現身宣傳活動，這天JuJu由媽媽帶來跟監製戚家基重聚。劇集拍攝完成已有大半年，JuJu再見監製Uncle Peter時表現雀躍，當JuJu看到送給他的暴龍公仔時十分興奮，更全程攬到實。
JuJu說起話來仍帶點BB音，問他叫甚麼名字？初時他會整蠱做怪擺出鬼馬表情，之後才以不鹹不淡的廣東話說︰「我係暴龍哥，JuJu，我係5歲。」然後他又介紹手中的暴龍公仔說︰「佢叫Bubble，6歲（佢係哥哥？）唔係，我係哥哥，有妹妹。」問他愛錫妹妹嗎？他搞笑地說︰「Sometimes同佢打交，但not always。」
當拿着鄭中基（Ronald）的劇照給JuJu看時，他微微笑說︰「Magic PaPa。」JuJu媽媽解釋說︰「Ronald好好，休息時會同佢玩，又用銀仔變魔術，所以叫佢做Magic PaPa。JuJu媽媽又指Ronald好細心，有一次JuJu睡着，Ronald幫手抱起他，當交到媽媽手時，更問她左手還是右手，JuJu媽媽感動的說︰「佢應該湊慣仔，問我抱慣左手定右手。」之後當JuJu看到自己一張污糟樣的劇照時，他語氣加強力度說︰「Only paint，拍戲only。」問他靚仔嗎？JuJu帶點怕醜細細聲說︰「梗係……靚仔。」JuJu又表示最喜歡Marvel中的超級英雄Deadpool（死侍）。
劇組最初在200多名童星中，未能找到心水人選，直至工作人員向監製推薦完全沒有演出經驗的JuJu，一拍即合，問JuJu媽媽為何讓兒子拍劇，她說︰「剛好嗰段時間停課，佢嘅表姑媽同表姑姐都喺劇組做服裝指導，所以帶佢去（試鏡）。JuJu性格比較慢熱，怕醜啲，所以畀佢試吓，拍完之後佢係唔同咗，群體接觸多咗，識得聽人講。平時佢鍾意講英文，所以中文弱少少，但𠵱家佢都肯講中文。」至於JuJu為何樣子有點混血兒？JuJu媽媽說︰「JuJu上幾代係有外籍家人，所以有啲遺傳。」而劇中演5歲版暴龍哥的Jasper，原來跟JuJu是表兄弟。
對製作人來說，拍童星是一大考驗，而JuJu開工兩天便融入當中，監製Peter說︰「佢成日坐喺導演位望住個mon，又識得嗌action，有次佢仲揸住對講機話『儍Bill（副導演）action』。」有樣學樣十分搞笑。JuJu最近開埋Ig吸粉絲，短短個多星期，已吸納七千多位followers，是繼Coffee囝囝，同李璨琛女兒肥Lucy之後，又一位受歡迎的小網紅。而他的Ig中有暴龍妹Olivia登場，她肥嘟嘟表情鬼馬，亦很有機會爆紅，不過據知JuJu父母想子女過平凡童年，故除之前JuJu接下劇集贊助商的廣告，暫時未再接下其他新廣告。
問到JuJu媽媽，會否再讓兒子拍戲？她說︰「再拍會睇情況，我好open mind，要睇件事有冇意義，希望睇咗套劇會令人開心，今次劇組同演員都好照顧小朋友，係JuJu一個好好嘅回憶。」JuJu媽媽並非一般的怪獸家長，反而重視小朋友學習過程開不開心？她說︰「原本JuJu讀緊傳統學校，但係佢喜歡運動，嚟緊佢會轉去國際學校，以sports為主比較適合佢，小朋友讀書好辛苦，唔想佢被功課淹沒咗，男仔係要跑吓活動吓，想佢童真啲。」
