曼聯雖然喺國際賽前夕以3:1擊敗愛華頓成功反彈，但唔係個個球員都咁開心㗎！其中近兩場都被貶為後備嘅法國中場保羅普巴，似乎就唔係幾滿意喺曼聯嘅處景，事關法國國家隊領隊迪甘斯禮拜一喺記者會上就話：「我好了解普巴，𠵱家佢喺曼聯嘅情況，肯定會唔開心，不論係上陣時間定係場上嘅位置。」迪甘斯又解釋，普巴踢得唔好係因為未到最佳狀態，仲話最衰都係武漢肺炎，搞到中過招嘅普巴未搵番節奏喎！有傳皇家馬德里希望乘虛而入，下年就會出價6,000萬歐元買佢，增強中場活力。
除咗普巴，返到曼聯後一直做迪基亞後備嘅年輕門將甸恩軒達臣，有傳1月又會被外借出去，皆因英格蘭國家隊主帥修夫基講明，佢要有上陣時間先有機會挑戰英軍首席門將位置。不過今夏加盟嘅新兵卡雲尼就好開心喇，上周六成功喺英超開齋後，熱愛大自然嘅佢走咗去行山慶祝，前曼聯名宿奧雲仲話如果卡雲尼10年前就嚟到曼聯，肯定可以入超過100球，暗寸𠵱家嘅曼聯中場唔夠輸送。
