歐洲武肺疫情繼續嚴重，家陣好多國家頒佈新一輪防疫政策，包括推出旅遊禁令，防止國民去完某啲國家後，將病毒帶返國內。不過呢個時候，國際足協（FIFA）、歐洲足協（UEFA）甚至各國足總等決策單位仲堅持踢國際賽，就連無關痛癢嘅友賽都要踢，罔顧球員健康，仲搞到好多安排都亂晒籠，唔知佢哋會唔會反思到底係為乜？
關於疫情期間仲應唔應該踢國際賽，反對嘅人一直唔少，包括不時同國家隊發生利益衝突嘅球會。熱刺領隊摩連奴上個月先同英格蘭主帥修夫基，為咗死都要揀哈利卡尼踢無謂嘅友賽隔空互窒，卡尼呢單亦唔係冰山一角。歐洲家陣疫情越嚟越嚴重，但FIFA同UEFA都冇就呢個情況讓步，完全冇考慮過球員或涉事單位感受。
好似最近推出封城令嘅英國，開始禁止部份人士由發現疑有變種病毒嘅丹麥入境，精英運動員都冇得豁免。英格蘭同丹麥喺歐國聯同組，雖然2隊11月唔使對，但同組另一對手冰島就會喺呢個月先後同佢哋交手，而且喺下周日先作客丹麥，下周三再訪英國，因此喺英國新推出嘅防疫政策下，冰島大軍入唔到境，如果要踢就要去中立場。位於東歐嘅阿爾巴尼亞足協，雖然肯借場畀兩隊踢，但國內輿論就話如果咁決定都幾荒唐，《每日郵報》專欄作家馬田森姆寫文抨擊，話又唔係咩大賽，而呢屆歐國聯又唔關乎大賽資格，根本呢個盃就係為咗娛樂UEFA理事會入面啲成員，一啲意義都冇。
除咗冰島班球員入唔到英國，本身約咗今周友賽對丹麥嘅瑞典，近日都喺球會壓力下宣佈五位喺英格蘭同蘇格蘭聯賽效力嘅球員，都唔使踢呢場波，否則呢班球員返嚟英國後就要隔離14日；至於丹麥足總就自己知自己事，早就講明今次唔會召英超球員。另外，意大利賽會早前亦協議，如果有意甲球會近期出現過確診病例，所有球員都要隔離10日，但最近包括高拉洛夫在內幾位喺意甲效力嘅塞爾維亞兵，就偷偷出境返咗國家隊報到，佢哋嚟緊要對蘇格蘭，仲未知可唔可以披甲。
原本為國家隊出戰係榮譽，但家陣安排大亂，球員搞到好狼狽，加上踢球會比賽都踢到攰，國際賽未打，上個禮拜又有幾間豪門添傷兵（見附表），好似阿歷山大阿諾特、安素法迪同甘美治等，都證實要養傷一段時間，唔知國際賽期後又有幾多球員要做十字軍。