究竟香港有對特首林鄭月娥有幾不滿？八方唔使多講，只要睇民調，長期有四、五成人畀零分佢就知，但今次佢竟然連澳門人都辣着，仲要支持民主、建制嘅澳門人一齊鬧佢，就真係能人所不能。事關777行使特權，仲要個特權大到連澳門司長都冇，咁又難怪澳門人火滾。
話說777同一班港官去澳門參加博鰲亞洲論壇，雖然佢哋到訪前、抵達後都有做武肺測試，仲要受封閉行程管理，但澳門人就好不滿點解777同佢班官可以唔使隔離？最令澳門人火滾係，之前澳門經濟財政司司長到香港參加何鴻燊喪禮，返澳門亦要遵守防疫規則隔離14日，777特權仲大過澳門司長，澳門人啖氣又點下？
八方見親建制《澳門日報》fb貼咗有關報道，但絕大部份留言都係開777同澳門官員拖，有網民問點解777得，澳門人又唔得？呢啲咪一貫只許州官放火，不許百姓點燈囉！又有網民話777一行人話就話封閉行程，但佢哋住酒店、食飯、出席論壇等會接觸到澳門人同官員，萬一傳染佢哋點算？仲有人直情叫777唔好嚟澳門，「其實佢過嚟做咩？小事唔使佢幫手，大事佢又幫唔到手。自己都未管理得好個政治班子就咪出嚟獻醜啦。」
李八方