美國大選幾近塵埃落定，但呢場大選搞到美國人面對撕裂問題，香港人都一樣上晒頭，失去理性。好似前眾志秘書長黃之鋒日前就寫咗篇長文，講自己對於美國大選嘅諗法，仲寫咗成17點咁多，全文足足有3,000幾字，但以為呢篇鴻文可以幫大家拆解美國政局迷思，甚至令大家放低擔心，唔使再驚特朗普連任失敗，美國就唔再撐香港？咁之鋒呢位少年就真係太年輕了，因為篇文經連登轉載之後，連登網民自有另一番見解。
之鋒篇文喺連登一日之間，換嚟超過廿版留言討論，雖然當中有網民理智分析解讀，但亦有人連登巴絲二話不說，一口斷定標籤之鋒「明顯佢真係民主黨嗰邊」。之不過，如果有仔細讀過之鋒篇文，佢有清楚講自己過去六年打國際線時，見共和黨國會議員都多過民主黨，甚至喺佢fb仲可以搵到佢之前同共和黨參議員Marco Rubio嘅合照，之鋒仲連兩人合照都貼埋，所以根本唔明點解都仲跟民主黨扯上關係，難怪都忍唔住呻，「寫完幾千字，解釋完一大輪，結果竟然見到連登都係咁，我真係唔知講乜好」。
李八方