「都話我哋唔夾咯！」因乜解究陰謀情人……吖唔係，係音樂情人鄭子誠講埋啲咁嘅嘢呀？唔通同情人掟煲？no！no！no喇，唔係話同情人唔夾，其實佢係為競爭事務委員會拍宣傳片，提醒一班商戶做生意嗰陣，千祈唔好同對手夾價，削弱消費者同企業嘅市場競爭力呀！
鄭子誠其實喺2017年已經幫競爭事務委員會拍咗兩集「舌尖上的陰謀」宣傳片，用網絡潮文講男人嘅浪漫，豆腐火腩飯做引子，介紹瓜分市場嘅行為，而佢今次再幫競爭事務委員會拍攝新一輯宣傳短片，就一口氣拍咗五條短片介紹合謀定價概念，無論價格上落、優惠折扣回贈、甚至統一方式計利潤，都算係合謀定價㗎！呢套短片會配合競委會嘅「打擊合謀定價」宣傳活動，教育大眾做生意要識得「同合謀定價分手，有競爭先會長久」。
競委會話，𠵱家6宗已經入稟競爭事務審裁處嘅個案入面，有5宗都涉及唔同形式嘅合謀定價，顯示呢種行為喺各行業都幾普遍，所以今次會再舉辦企業講座、電視宣傳呢類公眾教育，加強大家關注。競委會仲溫馨提示各位，如果你係合謀定價一分子，應該盡快向競委會申請寬待或提供合作，千祈唔好以身試法呀。
李八方