現年68歲的洪金寶日前接受鄭丹瑞（阿旦）邀請，接受其網上節目訪問，當日洪金寶面色紅潤，身手靈活，跟今年5月譚詠麟在網上貼出合照時的暴瘦完全不同，洪金寶笑言自己仲有少少戲，堅持不會退休：「家人冇得勸，我哋幾十年到𠵱家都係咁，由老婆識我到𠵱家，生活、食呀都係我博返嚟，如果以前唔博就乜都冇，我𠵱家唔係唞，遲少少就可以『長唞』，哈哈！好多人叫我退休，我會諗點解要退休？第一我仲講到嘢，可以鬧到人，第二我諗到嘢又講得到，我點解要退休，上天畀我呢啲嘢做乜啫，當覺得自己真係退化晒，咁自然費事出醜，我唔係唔想退休，只係想真係做唔到，我先退休，𠵱家仲有機會嘅，我都想盡量去做。」問到洪金寶是否減肥瘦了，洪金寶搞笑說：「個個話我瘦咗就瘦咗囉！」
洪金寶表示膝頭長期受傷勞損亦動過手術，他說：「早期拍武俠片，幾高都跳落嚟，下面全部冇墊，曾經膝頭哥撞落石頭受傷。」洪金寶又直言雙手斷過三次：「當年拍《最佳福星》要喺樓梯，雙手撳住『起雙飛』雙腳向前踢，我一撻落地隻手斷咗，即刻去醫院打石膏再返片場繼續拍。」
