經過神之預測再回歸後，星期日先中全北汽車贏波加「大」，再加上群馬草津溫泉又「大」到，大家跟我應該都有理想回報。國際賽期殺到，各大聯賽都休息一吓，不過日職又冇影響，繼續開快車，大家星期三晚就可以搵食。
之前做過日職燈神，反省過係因為太睇重往績，心水就成日中伏，日職真係比較多反覆同突如其來，好多時球隊都一時龍一時蟲。今期玩另類，由另一個角度出發；先講第一場心水，我鍾情主隊大阪飛腳，已經11場不敗，盤路又非常正路，上仗打吡戰賽和櫻花，受讓平/半都食半個盤，主場對神戶勝利船（圖），神戶輸嘅機率可以話係九成九，要上盤真係相當正路。不過周中波好多蠱惑嘢，所以就要用神一般嘅預測，估神戶今場反底贏波，整番吓回馬槍，古古怪怪，唔好用正常人諗嘢方式估神戶，冷冷地要埋2.55倍W。大家留意神戶，會睇佢派唔派恩尼斯達落場，儍仔嚟嘅，你估比賽鬥年紀大咩，所以唔好用正路諗就掂，如果「小白」呢場後備更加要神戶。
廣島三箭上場對浦和紅鑽，落後情況下鬥到最後階段追番1:1，戰績算唔錯，連莊家都睇好，今場主場鬥名古屋鯨魚仲要讓平/半。鯨魚上場紅牌打少一個都仲可以和到鳥棲砂岩，拎番一分不過體力消耗大，今場又有巴西前鋒加比爾沙維亞停賽，連續三場作客，照常理大家應該踩多腳要上盤。我就一定對着幹，追番住呢條大魚，博佢一個翻身掀起大浪。疫情波千祈唔好諗得太正路同太理性，奇雲迪布尼都唔入12碼，有咩唔會發生呀！
文：黃耀富
截稿前馬會尚未開盤，盤口僅供參考，讀者記得留意足智彩網頁。